Gaan die rand aanhou verswak en moet ek so gou moontlik my geld buiteland toe skuif?

Die wisslevalligheid en onlangse verswakking van die rand is vir baie beleggers rede tot kommer. Dit is veral ná toenemende tekens van politieke onstabiliteit en aanduidings dat die ekonomie besig is om te krimp.

 

Emosie kry die oorhand

Emosie kan maklik die oorhand kry en is vet op die vuur vir beleggers wat “sommer alles buiteland toe wil skuif” wanneer betogers die N3 ontwrig of Delareyville lamlê. Op dié manier word geld impulsief geskuif, eerder as om ‘n deurdagte besluit op grond van ‘n bewese strategie te maak.

 

Rand wispelturig

Die rand is ‘n baie wisselvallige geldeenheid en geneig om te oorreageer op positiewe óf negatiewe nuus. Elke groot verswakking van die rand word gewoonlik gevolg deur ‘n tydperk van oormatige verstewiging.

Die meeste beleggers is daarna spyt dat hulle impulsief, in reaksie op die rand se verswakking, hul geld buiteland toe geneem het.

Die wisselvalligheid kan ‘n mens die afgelope drie jaar sien. In 2015 het die rand tydens Nenegate tot byna R17.00 teen die dollar verswak en ná die verkiesing van president Cyril Ramaphosa het dit weer tot R11.50 verstewig. Sonder Ramaphosa sou die rand na verwagting vandag terug op R17.00 of swakker gewees het.

Insiggewend is dat beleggers, volgens beleggingshuise, selfs tydens die maande toe die rand verstewig het, hul geld die land uitgeneem het. Dit is omdat die situasie in ons land ook ander risiko’s inhou.

Die vraag is of die vlak van politieke en ekonomiese verdraagsaamheid nou oorskry is?

Die laaste strooi was sekerlik die swak plaaslike opbrengste die afgelope drie jaar en die Suid-Afrikaanse ekonomie wat in die eerste kwartaal vanjaar ‘n negatiewe opbrengs van 2.2% getoon het. In Mei het handelsbedrywighede, volgens BankservAfrica se indeks, boonop met 2% afgeneem — die skerpste sedert 2013.

 

Ontluikende lande kwesbaar

Die verstewiging van die dollar en die stygende rentekoerse in Amerika beteken dat die geldeenhede van ontluikende lande, soos SA, verkoop word, omdat die lande hul skuld, veral in dollar, moeiliker sal kan vereffen.

 

Ontluikende lande word ook vermy weens die moontlike handelsoorlog tussen Amerika en die res van die wêreld waar die ontluikende lande aan die kortste ent sal trek. Hierdie lande is boonop blootgestel aan die gevolge van die Amerikaanse sanksies teen China (die rand het met die aankondiging tot bykans R14/$ verswak) omdat dit groei in China sal benadeel. Dit beteken ontluikende lande sal minder na China kan uitvoer.

 

Wêreldfondse vaar goed

Sekere internasionale beleggingsfondse, soos globale aandelefondse, toon uitstekende opbrengste en klop ons eie aandelemark die afgelope vyf jaar.

Die drie top globale aandelefondse in Suid-Afrika het, volgens Morningstar, die afgelope vyf jaar gemiddeld tussen 13 en 14% per jaar gelewer. Die FTSE/JSE Algemene Indeks het oor dieselfde tydperk ‘n opbrengs van 9.16% per jaar getoon.

Baie mense wil in spesifieke sektore, soos tegnologie, belê en dan is Naspers eintlik die enigste opsie op ons beurs. Globale aandelefondse bied beleggers geleenthede om in goeie tegnologie-aandele soos Facebook, Apple, Microsoft en Amazon te belê.

Globale fondse bied blootstelling aan lande, soos China en Indië, met hoë groeikoerse en ook die geleentheid om in meer bestendige ekonomiese streke en spesialissektore soos biotegnologie te belê.

Ontwikkelende lande soos Suid-Afrika is baie blootgestel aan kommoditeite/hulpbronne en beleggers belê juis in ontwikkelde markte en lande wat anders op wêreldgebeure reageer.

 

Randverskansers

Om jou geld na die buiteland te skuif, is gelukkig nie die enigste manier om jou geld teen ‘n verswakkende Suid- Afrikaanse ekonomie te beskerm nie. Baie beleggers

het reeds onregstreekse blootstelling aan die buiteland met randverskansingsaandele soos Richemont, MTN, SAB Miller en Ecsponent Limited – 30% van Ecsponent Limited se bates is in Amerikaanse dollar en Euro gedenomineer. Van hierdie maatskappye is plaaslik genoteer, maar verdien die grootste deel van hul inkomste in die buiteland.

 

Skuif om die regte redes

Die onsekere politieke klimaat is een van die swakste redes om geld buiteland toe te skuif. Die hoofredes behoort diversifikasie te wees, die behoefte van die belegger en aptyt vir risiko.

Buitelandse beleggings is ‘n belangrike deel van ‘n goed saamgestelde en gediversifiseerde beleggingsportefeulje. Dit is egter nie ‘n magiese bateklas wat outomaties rykdom gaan verseker nie en baie beleggers is ontevrede met hul buitelandse opbrengste, veral as die wisselkoers ook teen hulle draai!

 

Laai Nuusbrief af in PDF